Calvin a nase na Kòrsou, 24 di aprel di aña 1953 den un famia kristian di 12 yu. El a kombertí i bira un yu di Dios na edat di 17 aña i for di e edat ei el a kuminsá sirbi Señor te dia di awe.
Calvin a studia pa bira maestro di skol i a traha na skol básiko i tambe na skol avansá, unda el e funshoná komo dosente di Siensia Sosial. El a studia Beibel na Word of Life Bible Institute na Schroon Lake New York unda el a graduá na aña 1978 huntu ku Sylvia ku lo bira su esposa 1 aña despues.
Calvin i Sylvia a bira mishoneronan di Word of Life International pa Antias i Aruba i a funshoná den e ministerio di evangelisashon i edifikashon di hubentut di aña 1979 pa 1994.
Durante di e periodo aki tambe Calvin a pastoriá e kongregashon di Iglesia Aliansa Evangélika Lus di Mundu. Na aña 1996 Calvin a funda e obra nobo, Iglesia Grasia Abundante, ku a kuminsá ku un estudio Bíbliko di mas o ménos 20 pèrsona pa un kongregashon di 400 kreyente aktualmente.